Lumbung Libau Rentap

Pemacha mayuh, bangkai raja berani kitai Iban ke benama Libau Rentap tu enda ditumbakka orang tang dilumbung bala peturun iya di Bukit Sibau, ulu Wak, Pakan. Lumbung Rentap di Bukit Sibau diaduka perintah Sarawak baru ngena ungkus kira RM40,000.00 kena 28.10.1989 ti diuluka Datuk Patinggi Tan Sri Alfred Jabu Anak Numpang, Sapit Kepala Menteri Sarawak.

Ari gaya tulang tubuh iya ti disukat Dr. Vijandren ari Universiti Malaya kena 7.10.1989, peninggi Libau Rentap tu kelia dipelabaka bisi 5 kaki 8 inchi. Kena ngingatka Rentap, perintah Sarawak bisi ngaga tugu iya ba Museum Garden, Kuching kena 27.7.1993. Kelimpah ari nya, kitai mega bisi meda Jalan Rentap enggau Dewan Panglima Rentap di Betong. Opis Saribas District Council ke diatu mega diberi nama Kubu Rentap. Mayuh mega pub enggau lounge ngena nama Rentap.

Langkau lumbung niang Libau Rentap di Bukit Sibau, ulu Wak, Pakan. Lumbung Rentap di Bukit Sibau diaduka perintah Sarawak baru ngena ungkus kira RM40,000.00 kena 28.10.1989 ti diuluka Datuk Patinggi Tan Sri Alfred Jabu Anak Numpang, Sapit Kepala Menteri Sarawak. (Gambar diambi ari Facebook Isa Lee)

Rentap bisi menyadi bukai empat iku ke benama Ringgit, Jarup, Lepo enggau Serini. Lepo tu belaki sereta pindah ke Ngemah lalu Serini belaki sereta pindah ke Muput, Anap. Rentap enggau Sawai nadai anak tang iya ngiru anak indu dua iku ti benama Tambong seduai Ensimai. Nyadi Ensimai tu endang anak menyadi ke lalu nyadi kepala manuk sabung Rentap empu ke benama Ringgit.

Rangkah tulang niang Libau ke beensumbar Rentap

Rangkah tulang niang Libau ke beensumbar Rentap (Gambar diambi ari Facebook Isa Lee)

Enggau bini baru iya ke benama Berinjan (anak umbung ke digelar Rentap “Ranee Bukit Sadok”) mega Rentap nadai anak. Ketegal jadi enggau Berinjan (Berenggang) tu mih Rentap nyau nadai kuasa ajih ke diberi orang Panggau Libau ngelama tu laban pengaruh ke dikena iya matak serang abis dibuai sereta ditunu bini iya Sawai ke udah nya lalu ngerarika diri nitihka uchu iya Subang ke belaki jadi enggau Munan (Penghulu Dalam) di Bawang Assan, Sibu. Sawai tu kenu ku sida ke tuai iya nya menyadi indu Lintong ke bensumbar Muahari, Iban ari Batang Lemanak ti matak bala pindah ke Julau, pati Kanowit.

Rangkah tulang & keruntuk niang Libau. Kitai ngarapka bisi bala pemesai tau meri bajet dikena ngaduka lumbung Rentap tu baru. Iya patut disimpan ba kutak kacha awakka enda ulih japai tauka tegu tang ulih dipeda awakka likun gaya. Enti majak tauka dilakka baka ke diatu, nyau kelama ila rangkah tulang deka dilamun uras.(Gambar diambi ari Facebook Isa Lee)

Tambong ke belaki diambi Layang mega nadai anak. Seduai iya ngiru anak indu siku ke benama Subang. Subang tu kelia belaki diambi Penghulu Dalam Munan anak Minggat. Subang enggau Munan mega punas. Nya alai seduai iya ngiru anak tiga iku ke benama Umi, Lembai enggau Niut. Ari nya dih Penghulu Dalam Munan tu kelia suah disebut sida ke tuai Munan apai Umi.

Anak Rentap ke benama Ensimai belaki jadi enggau Chundau. Seduai tu mih nurunka bala peturun Rentap ti nguan menua Wak, Pakan, Julau datai ke sehari tu.

Lumbung niang Libau (Gambar diambi ari Facebook Isa Lee)

Taja rita iya bedidit ke langit ngilah bulan, berayah ke dalam tanah ngilah Sebayan, bereni ke dalam ai ngilah kerangan; dengah aki kitai Libau Rentap tu kelia kenu ku jerita semina tiga (3) igi aja nyengkaum siku bansa Laut ke dipaduka Sultan Brunai ngumpul pupu taun tauka pupu pala ari bansa Iban. Laut tu dibunuh iya laban ngakal bansa Iban ngena pasu mengut ke betunjang lelapan. Iya sigi enda ngiga dengah mayuh laban nitihka jaku ajar Keling ari Panggau Libau ke meri iya pengaruh dikena matak serang ke dikumbai Batu Jerenang ti enda ngasuh iya peneka ati munuh munsuh, semadi mih dikena ngidupka seput diri. Nambahka nya, tuai tuga serang sigi jarang endar enggau orang betachah ngelaban munsuh laban semina ngemataka bala manuk sabung iya beamuk. Semadi mih enda alah bala manuk sabung iya, nya baru tuai tuga serang tu angkat. Tuai tuga serang kitai Iban dulu kelia ke dipelabaka bisi ngembuan Batu Jerenang baka enggi Rentap tu iya nya baka sida Sumping, Gerinang ke bensumbar Nitik, Ngumbang ke bensumbar Berauh Langit enggau Penghulu Dalam Munan ke bensumbar Nitar Begemung laban orang ti ngembuan pengaruh Batu Jerenang tu sigi deka punas, nadai anak enti sema iya empu bisi bedengah munsuh.

Silik agi pasal jerita bala bujang berani kitai Iban kelia, nyengkaum Rentap tau dibacha ba bup Iban Sarawak Pegai Rajah Brooke.

Dua iti bup ti ngenang jerita bansa Iban.

Info: Gambar lumbung Libau diambi ari album Facebook Isa Lee.

16 responses to “Lumbung Libau Rentap

  1. nyau kepuas aki buyung tu kayau anak ngagai menua minggat tang aki buyung udah munoh bala minggat orang lalu begau sapa orang munoh sida iya.orang lalu bejako nadai orang bukai sigi buyung iya lalu nyaut buyung meh tu giga orang nadai ga temu abis kena indik orang kaki iya enda meh orang meda laban enkarabun di beri bunsu empeliau.sekali tu iya deka munoh anak umbong minggat laban sida iya enda nganjung madi iya lenta.kira tengah malam nyau iya niki puchuk pinang ngimbai rumah sida minggat ngiga jalai ngulih ka anak umbong minggat.iya lalu niki perabong lalu mabak atap lalu ngulur ka diri ngagai meligai anak umbong minggat datai iya dia lalu silak ka kibong anak umbong minggat lalu sayat iya .ninga utai munyi ujan orang lalu begau nadai orang bukai tu sigi buyung .aku meh tu ka iya enti kita enda nganjung madi aku pulai aku sigi enda badu munoh kita ka iya tang giga orang enda ga temu.lepas iya munoh anak umbong minggat nya baru bala minggat nganjung madi iya tenun seduai lenta madi saging orang kai nganjung iya bala enchana ba antara menua orang tu orang manah enda nanah ka sapa sapa.pulai baru ngagai cherita munan kai jadi enggau subang.kita ga nanya nama kebuah munan jadi enggau subang.baka tu ka iya bakih.munan bisi mimpi di asoh antu ngiga indi to benama subang enti iya jadi enggau indu ti benama subang nadai orang oleh ngalah ka iya sereta tau kayau tau mulau numbang ka menua.nya iya ngiga indu ti benama subang.tang indu nya endang musoh besai sida apai iya minggat.endang uchu orang pugu berani endang tuai bansa iban.tang seduai iya jadi ukai di menua wak tau ulu empit iyajadi enggau subang ba menua bawang asan pegai sibu laban layang kai pindah ngagai menuo nya subo nitih kai entua indu iya nya sawai madi biak sida litong kai besumbar muo ari bala rentap nadai pindah nguan menua kerangan panggil antara menua kedup enggau reboh tau tebok diatu.aku arap ka kita anang ngambi ati enti nyema jako aku bisi enda manah tau kai enda nyamai dinga.laban orang nanya nama kebuah munan jadi enggau subang .tambah minggat apai munan endang musuh besai sida rentap.laban aku sepiak indai endang orang orang awik apai aku orang kabo.sekali agi aku minta ampun madi kaban belayan aya ibu laban nyebut pasal utai tu bablock kita.from welson manjan tarang.

  2. manjan tarang

    aku nampung baru aki saging seduai aki buyung kai mai pala bala sida serumah kai udah di bunuh bala minggat seduai iya lalu mulai ka diri mai ati ti pedis sereta ngeransi datai seduai ba nanga ingu ke di kumbai orang tembawai burung diatu laban menua endang nadai iban nguan menua nya.tang enti nitih ka aki buyung iya endang enda enggau saging pulai lalu deka malas pengawa sida minggat kai munuh apai iya tang baka ni pan tua mesti pulai nganjung bangkai sida iya ngagai pendam.tak pandak meh jako aki buyung maya nya datai seduai di menua sida iya lalu ngintu bala kai mati udah di bunuh minggat.udah bekau nganjung antu sida lalu diau tiga ari lepas tiga ari aki buyung lalu madah ngagai sida serumah deka nurun bebalas kai pemarai bala sida iya serumah lalu deka ngambi madi iya tenun seduai lenta kai di taban kai minggat jadi ka ulun.mupuk meh buyung lalu nyikap diri endang nurun ngayau tang iya enggai mai orang bukai.awak ka iya aja enti aku mati siko aja ga pio ka aki buyung tu kelia tang iya mulunggang ari ulu empit lalu nengah menua kai di kumbai tinting enkaranji lalu masa menua ai semambu lalu ngulu ai kabo laban ngelawa bukit tebujang antara menua awik enggau kabo datai di bukit tebujang iya lalu bemalam tujuh ari buyung ngelingie bukit tebujang malam tindok ga iya ari ketujuh iya tumu amai tindok tak baru tindok alai lalu bemimpi asai kai betemu enggau indu dua iko indu nya lalu ngangau ka iya lalu buyung ka indu nya.peda buyung indu nya bajik amai gamal lalu kitu agi kai buyung kaindu dua iko uji nuan buyung nyukat ai telagatu tu lalu sukat buyung lalu depa buyung asai dalam mimpi bisi panjai tiga sepi iya.udah nya indu nya bejako baru apu neh buyung amat pama nuan berani meh nuan sereta kebal menua tu nadai nadai orang tan laban nuan enti bebunoh iya lalu tedani.udah bekau nya buyung lalu nurun ari bukit tebujang ngagai menua awik iya selalu ngipa orang nurun kumai dua tiga iko sigi di bunuh iya magang nama iya udah munoh bala minggat iya lalu pulai ngagai bukit tebujang baru.dia meh rumah ba bukit tebujang laban seagi orang enda nganjung madi iya tenun enggau lenta pulai iya sigi enda badu kayau anak ngagai minggat.puas iya kai diau dibukit tebujang kediri nama siang nyau ga iya nyumpit sekali iya tepeda kai impeliau labang sumpit iya kena enda ga lambuh anti lambuh enda ga lambuh nyau abis laja iya enda ga oleh jelu empeliau nya.iya lalu mulai ka diri ke langkau tak enda berasai alai iya lalu tindok iya lalu bemimpi betemu enggau indu siko lalu madah ka diri endang nganti nuan aku tadi buyung nuan enda iboh ka aku nuan nyau majak nundi aku ka indu nya tu buyung aku meri nuan ubat enkarabun ngambi musuh enda olih meda nuan aku bunsu empeliau tubuh ichit wit nuan enda tau makai empeliau iya lalu tedani.lepas seminggu dua minggu mupok ga iya ngagai menua awik bebunoh ka bala minggat

  3. ba block tau ba ruai kita endor aku mantai ka penemu aku nyaut utai kai di tanya wat ba block dara bajik.iya nanya nama kebuah munan jadi enggau subang munan endang musuh sida apai iya minggat.lalu nanya pasal aki kami buyung ka bebalas selalu kayau anak ngagai menua awik.ditu aku empu nerang ka sereta madah utai ti betul.laban nadai siko bala ari aki buyung seduai aki saging nusoi cerita tu dalam bup tau ka dalam block,nyangka orang takut laban bemusuh diri semenua,baka tu mula iya nyadi bepun ari minggat kai ngalus kai menuo sapa orang enggai ngisi pupu ngena duit tau ka padi,nyadi sida aki buyung tu berumah ba menua kai dikumbai orang nanga wa antara kedup enggau empit sida aki buyung enggai mayar pupu laban aki buyung endang orang rari ari bukit sadok sereta agi ringat ngagai raja leboh maya nya suba rentap endang udah mati rentap mati karangan panggil antara empit enggau ulu wak mulai baru ngagai aki buyung leboh utai tu nyadi sida aki buyung meda burung sengayan bebitih baruh rumah tujuh ari lepas nya sida serumah bisi mati sida ngajung bangkai dalam pukul lima dini ari maya nganjung bangkai nya tinggal orang tuai sereta sida biak enggau indu kira dalam pukul enam diatu pagi ari alai datai bala minggat ari awik lalu niki rumah benong orang baru dani sida lalu belaban tang ni deh tan semina orang tuai aja kai bisi ngibun rumah,dia deh tudah duat baru angkat bujang lalu muruk ka diri ari pugu tanju lalu belanda madah kai orang kai nganjung antu ai maya nya ampuh emperan iya nyemerai ai kedup datai din madah ka bala minggat ngalah ka rumah sida.lalu enkechit saging lalu angkat buyung,kita bukai enda iboh enggau awak kami duai aja pio ka buyung datai seduai ba rumah dia seduai meda bangkai apai buyung sereta bangkai buri apai saging sereta bala bukai ini tenang saru di bunuh bala minggat laban iya ngena baju burung semua sida mati lima iko.meda baka nya buyung seduai saging lalu nitih ka bala minggat seduai lalu melunggang ari tinting belega lalu ngili ingu lalu nengah tembawai burung kai diatu maya nya subo ba ai kabo bedau dewan kitai iban seduai iya lalu niting bukit lubong ba lintang batang nanga risau kai diatu nya bala echana orang nya enda ngari ka sapa sapa tengah ari lalu titih ka seduai iya nengah tinting temiang seduai lalu melunggang ka sepiak lalu tegah seduai iya bala minggat lalu tinggal pala tiga igi tang bala minggat bisi bakal laban aki saging iya nya bunga lulun lalu titih ka seduai baru di tegah seduai tinggal magang pala sida serumah.tang adi buyung kai bedama tenun sereta adik saging kai benama lenta lalu taban kai bala minggat lari nyadi ulun sida minggat

  4. Sinu mh kitai ngenang aki kitai libau,kitai ka agi kering agi gerai mh ngadu ka tempat tauka kubur bansa kitai ibanka benama libau Rentap bujang brani kitai iban ka matak menua dulu kelia.Nt kitai nda ngenang aki kitai libau sapa agi di anti kitai menyadi………..

  5. rindu macha jerita tuai iban kelia,agi bisi kini jerita sida?

  6. manah bendar enti bala yb kitai ulih ngagih lalu nyadung bup cherita dalam jaku iban ngagai rumah panjai,awak ka bisi nyadi kereban bacha kitai di rumah panjai kelebih agi bala nembiak rebak baru

  7. LINGAI-LINGAI – SINU TI NGENANG SERAKUP ATI TUAI IBAN DULU KELIA… LABAN TUAI IBAN KEMAIA DIATO NADAI SERAKUP ATI NGEMAJU KE BANSA DIRI

  8. LINGAI-LINGAI – SINU TI NGENANG SERAKUP ATI TUAI IBAN DULU KELIA… LABAN TUAI IBAN KEMAIA DIATO NADAI SERAKUP ATI NGEMAJU KE BANSA DIRI

  9. Terima kasih ngagai MPegari ti udah pos majalah jerita tuai iban,

  10. BUKU JERITA TUAI BANSA IBAN ENGGAU IBAN PEGAI RAJAH BROOKE,TU UDAH 50 TAHUN DAH MEREDEKA
    SEPATUTNYA BUKU TU TAU DI BERI NGAGAI SETIAP RUMAH PANJAI….NYA BARU PERINTH TI MADAH, BERI MEH DANA TAUKA PERUNTUKKAN NGAGAI RUMAH PANJAI…NGAMBI BANSA IBAN NEMU PENDATAI DIRI EMPU SERTA NEGALA TUSUT AKI INI KELIA. ANANG KELALU JUGAU MAJU KA BANSA DIRI EMPU. SERAKUP IBAN …..MAJU MEH KITAI

  11. ba kl dini endur ulh bgiga ke bup tok punggal…???

  12. BA HOTEL MEGA BISI AGI BUP NYA,LABAN AKU UDAH MELI DIA

  13. akih, ba menua nanga rebuh kami ditu tusah amat ka ngiga bup tu…nya kebuah ka nyan nuan akih dini ulih meli 2 iti bup tu?

  14. selamat pemaik enggau kitai sebuat…aku deka mantai ke penemu diri…aku minta kitai anang bekenaka nama sida raja berani kitai iban…ambika chunto dikena ba pub..nya enda manah bendar lalu kedua nya nanda ke kitai nadai basa peda bansa bukai ni bisi ngena nama raja berani sida kena ngaga nama pub…..

  15. Dina, ba Miri semina bisi dijual ba Miri Airport aja, iya nya ba kedai bup tingkat baruh & ba balai berlepas

  16. Ba miri Dini endur aku ulih meli bup tu.

Tinggalka komen tauka sadang nuan ditu

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s